Svein Kvitingen vaks opp på garden Kvitingen i Nordberg i Skjåk i ei tid då det vart gjort store framskritt i det norske samfunnet. Han var svært intelligent og las alt han kom over. Serleg interessert var han i optikk og våpen, og han var ein ivrig jeger all sin dag.
Kvitingen hadde svært gode teknisk gjevnader og konstruerte kikkertar og gevær. I tillegg var han ein dyktig urmakar.
Den seinare statsminister og utanriksminister Johan Ludwig Mowinckel jakta rein i Skjåk saman med Svein Kvitingen fyrst på 1900-talet. Den erfaringa han fekk gjennom jakta her og på Hardangervidda, var direkte bakgrunn for at han fekk gjennomført forbod mot bruk av finkalibra gevær under reinsjakt i perioden 1901-1906. Grunnen var flokkskyting og sterk desimering av villreinstammane.
Svein Kvitingen deltok som kjentmann i samband med høgfjellskommisjonen sitt arbeid med grenseoppgang av statens høgfjell.
Kvitingen var også turistførar og patentførar for Den norske turistforening. Han førde i mange år på ruta Sota - Nørstedalsseter i det som no er kalla Breheimen.
Svein Kvitingen bygde også fleire hytter og buer i fjellet. Mest kjent er Sveinbue vest for Lortjønn i Reinheimen som vart bygt på 1890-talet. Han etablerte Sota turisthytte og dreiv denne i mange år, der han også budde dei siste åra av sitt liv.